Day 1 行街街~

 6:05己經準備好一切，打個電話俾倩兒，原來佢刷緊牙~算la~呢d係佢做事既作風，總之佢冇乜遲到就得喇。6:35倩兒爸爸架的士駛到我屋企樓下個巴士站，倩兒媽咪都係到，真係羨慕死人，成家人送機!

7:10到達機場~第一時間去check-in，排左半個鐘頭隊就ok喇。原來有成三個團都係同我地同一班機喎!~唔知佢地d行程同我地一唔一樣呢~之後去左食個好難食既麥記雞扒早餐就去櫃員機攞錢，我攞左2500，倩兒就攞左3000。9:00入閘，飛機9:40就起飛喇～第一次坐飛機的感覺好特別，好期待～仲要有得坐窗口住添～不過隻耳仔好痛，同埋ｄ機位真係唔大，ｄ路又窄，厠所又細，飛機餐亦唔見得有乜好食～雖然對搭飛機冇乜好感，但係話晒都叫第一次～

2:00抵達仁川機場，個機場都幾靚ga~出左閘之後第一件事去兌換d won返黎~哈哈~港幣1對150.41won呀~即係我有成376,025，三十幾萬聽落係咪好多錢呢～之後我地去左information counter，問下人點去雪嶽山，因為我地真係唔夠資料去plan呢一日既行程。接待我地既韓人好nice，佢d英文都OK ga~本來我地諗住2:30就起行去酒店，但係我地因為要研究張電話卡點用，最後要成3:40先係機場的13A閘搭601-5巴士去明洞．架巴士真係好舒適，搭左一個鐘頭就到喇～

5:20準備好一切，從仁宗酒店906室出發去行街，本來諗住行晒新村同弘大，但係原來梨大同新村好近，所以唔去弘大去左梨大，行左好耐呀．我地呢兩隻為食鬼首先去左梁望峯介紹既Orange食生果同雪糕，我到都係指指點點咁叫佢俾ｄ野我地食，原來攞蕃薯當生果食幾好味ga~之後去左打機，打拍拍機呀．好平咋～我地發現街上面有好多小攤檔賣野食，而檔檔都有“神奇腸粉”呢？見到佢紅噹噹，我覺得佢係甜醬，誰不知佢並唔係腸粉咁簡單，而係好辣好辣既米糕呀 >x<!!!我同倩兒幾經辛苦終於食晒佢，佢連冰水都唔俾我地，仲要俾碗熱到爆既湯我地，諗起都覺得又辣又熱．所以食完即刻去左7-11買野飲．一路行覺得韓國都真係幾熱鬧，好多人，不過佢地ｄ樓無香港咁高，而且乾淨好多～

跟住去左梁望峰講既Auto-Toilet, 100won咋～不過倩兒俾佢ｄ人聲嚇親呀～（見圖）！一路行行到去梨大，入左間好平既文具店，買左把港幣3元 既剪刀黎整本行程簿（只可惜佢唔可以帶返香港）．倩兒好想去梨大既女子大學睇下，但因為入口條路太長，時間又緊逼，最後只好放棄．不過ｄ韓國女仔樣同我地 都好似無乜分別咁啫～無話靚ｄ醜ｄ，可能我係個女仔卦，叫ｄ男仔黎，佢地一定又一大長篇咁講港女與韓女之別．行街幾開心！睇到好多特別既野，好似魚乾餅， 其他小販檔同香港差唔多，不過佢地好多野食，日式，中式，泰式，各式其式，包羅萬有！諗住幫倩兒爸爸買ｄ裴勇俊既相，不過竟然係無既，之後倩兒買左兩張漫 畫相同一件好女仔既衫衫，咁我地就走左喇～9:35搭地鐡返明洞食人蔘雞，搵唔返書介紹個間，是但地入左一間，仲好隱蔽，全間鋪得我地兩個人，都幾好食，不過食到好飽．我地一路食一路諗點去漢城塔，因為地圖無指示，原來鋪頭有個女伙記識講國語既，仲帶埋我地去．臨走既時候我地係到映相，飲左ｄ人蔘酒個人好興，high high地，high到連錢都唔記得俾tim~    

10:30行到腳都跛，終於上到漢城塔既纜車站，搭左架單程既纜車上去，因為我地太遲喇，呢架係尾班車．漢城既夜景真係幾靚~但係都係同香港爭ｄ，因為香港有高樓大廈，韓國ｄ樓好矮，不過香港無塔lor～如果有既話可能會好ｄ～睇完夜景返明洞都成12點~本來諗住去明洞汗蒸幕，但係實在太貴喇～之後返酒店整埋本行程簿，人同相機都叉叉電，就休息喇～