Kagoshima Day 2
我喜歡食完早餐先開始一日的旅程, 所以每次BOOK 酒店都盡量揀有早餐包埋的~ 日本好多 BUSINESS HOTEL 都有包早餐, 但我自己就比較西式的早餐, 所以通常會揀SUPERHOTEL 或者APA 哩款有西式的BUFFET 食~ >V<
食飽飽後, 就開始一日的行程LA~
出發時已大約PLAN 定會去邊, 亦都睇定唔同的一日交通卷~
鹿兒島的交通一日卷有分兩種, 一種係WELCOME CUTE, 一種係“市電,城巴,City View一日乘車劵”, WELCOME CUTE 就貴D 要1000YEN, 第二種就600YEN, 但前者可以坐埋去櫻島的FERRY 同埋可以搭櫻島的巡遊觀光車. 但我SEARCH 過後, 唔係太想坐櫻島嗰款觀光車, 覺得大約只繞一圈細圈冇咩嘢睇, 反而想坐每天只有兩班的大圈環島遊觀光巴士, 當然就要貴D要1700 YEN~ 因為咁樣, 最後我只揀咗買“市電,城巴,City View一日乘車劵”
巴士站在中央車站外的四號站, 由九點開始至五點幾, 每半小時有一班車, 但不可以坐另一款叫城市巡遊的巴士 (比較細部有篤姬卡通公仔嗰部), 市電就再方便D, 夜晚都有得搭, 應該係本地LOCAL 主要的交通工具.
見到今朝都係天陰陰, 不過好彩冇落雨, 第一站就係先去維新故鄉館參觀吓。
鹿兒島以前叫作「薩摩」,在幕末與長州藩及土佐藩(現在的高知縣, 之前去四國時都有參觀過)有薩長同盟、薩土同盟的連攜関係,成為支持明治維新的大藩。這間展館便是介紹鹿兒島在幕末維新這段歷史中的重要地位。
我對日本維新的歷史沒有太大了解, 依稀用返中學的記憶大約就係當時一班維新志士希望推翻威信下降的幕末舊政府, 以組織現代化西洋化的新政府. 而因為維新三傑的重要人物:西鄉隆盛 (差不多鹿兒島最重要的人物, 就好似龍馬係高知一樣)、大久保利通出生的地方就在附近, 所以鹿兒島亦係明治維新一個好重要的地方~
維新故鄉館不算很大, 有上下兩層, 不過如果要睇哂都應該要2-3小時~
入面分為多個展區, 有介紹名人西鄉, 島津,篤姬等等, 亦有介紹維新階段的歷史, B1F 還有一個影視館可以有兩套大約25MIN 短片觀看, 因為時間關係, 我只看了薩摩student, go west, 那一套, 但內容都唔錯, 而且睇完後亦對當時那班勇敢的留學生非常敬佩. (中央車站前的銅像便是紀念他們)
大約用咗一個半小時, 就差唔多要去下一個景點-櫻島出發了!
櫻島是位在日本九州鹿兒島縣的鹿兒島灣中,是鹿兒島的象徵代表,也是一座活躍的火山,火山口距離有50萬人居住~ 之前見到櫻島爆發仲驚好似阿蘇咁會唔俾去, 但原來櫻島爆發的次數每年好多, 其實居民照樣上下班, 根本冇咩特別影響~ 我哋旅客更加唔駛擔心~
去櫻島就要搭FERRY 前往, 不過比我哋香港去離島更加方便, 船程只是15MIN, 而且每15MIN 就有一班船, 所以基本上係唔需要睇時間表的, 你任何時候去坐都有船係度等緊你~ 每程160 YEN, 因為我冇買WELCOME CUTE, 所以就要俾現金了, 船飛是在櫻島那邊才支取~ 鹿兒島碼頭附近有間水族館, 有一日卷就有COUPON 可以平D 入去, 我覺得有小朋友可以去參觀吓, 我就只係碼頭附近行咗一陣, 睇吓景後就決定早D去櫻島了~
FERRY 有幾層, 有分室內及室外, 坐室內的冷氣位或是甲板位都可以~ 入面見到個個都買咗碗烏冬黎食, 見到都有少少肚餓, 就跟D日本人一樣都買咗碗食, 味道OK, 但又未到非食不可~但15分鐘就要食哂, 所以想食的話最好一上船就買~
櫻島下船後, 下樓梯便是巴士站, 有之前我講過話WELCOME CUTE 會包的短線巡遊巴士
每天有八個班次,停留三個點後回到港口,時間約一小時, 使用WELCOME CUTE一日券可以免費搭乘
觀光巴士班次表:http://www.kagoshima-kankou.com/tw/areaguides/islandview-tw1_merged.pdf
櫻島港口附近有租車跟腳踏車, 如果時間充裕的話,可以選擇自駕去更多地方~~
但我自己就揀咗另一種, 就係搭每天只有兩班的環島巴士, 9:40 及14:30 各一班
因為去到只係12點, 而且係船上又食咗嘢, 本身想過租單車的, 但又怕有斜路同埋想四圍行吓, 所以就決定散吓步, 等二點半先再返黎坐觀光車~
櫻島其實都有幾多觀光點, 有D都幾近車站, 包括有VISITOR CENTER 同埋櫻島浴岩公園足湯, 觀光中心入面有一些櫻島的資料, 感覺好似讀返以前的GEOG 咁樣~ ^^ , 而足湯就好正, 可以自由地浸, 而且仲可以望住美麗的海景. 玩咗大約一個鐘, 見到仲有個多小時, 就打算行吓沿海的漫步徑去鳥鳥展覽台睇吓風景~
公園係最多遊客的地方, 之後的漫步徑都只見2-3個遊客, 比較寧靜, 之後行到去展覽台, 大約要30多分鐘的時間, 又係冇咩遊客, 不過下面有幾隻貓咪好悠閒地曬太陽~ 回程不走漫步徑, 浴車路的行人路走, 大約20分鐘左右就返到碼頭 (不過今次我行得急D, 怕2:30 返唔切), 最後都早10分鐘就返到巴士站, 搭巴士繼續下午的旅程.
環島的觀光巴士除了去湯之平展望台外, 仲會去多兩個景點停留, 包括係沈沒鳥居以及赤水展望廣場, 兩個景點都幾特別, 前者是因為岩灰而差不多蓋頂的鳥居, 可見當時的灰有幾厚, 後者是有很多熔岩的採石場, 兩者都值得一遊. 巴士上有美麗的日文小姐講解, 知道我哋係外地人亦會俾一份英文的講義我哋睇, 都叫好細心的安排
大約四點半完結行程, 我再行咗去自然恐龍公園睇吓, 係一個比較岩小朋友玩的地方, 玩咗一陣後, 就搭返船出返去鹿兒島
開始日落的櫻島的確很美麗
返到鹿兒島已五點幾六點, 已沒有巴士, 但唔駛擔心, 仲有市電, 就搭市電去天文館行吓街, 食DINNER 同埋等夜上20:05的夜景巴士上城山參觀~
天文館是鹿兒島的中心購物地方, 好似東京的新宿一樣, 有很多百貨公司及不同的商鋪. 我買咗一陣衫同行咗一陣後, 就去朋友介紹的うなぎの末よし買鰻魚~ 冇介紹錯, 好美味, 不過有少少骨, 但很香很入味~ 見到都有好多日本人黎食, 而且佢哋都食得好滿意咁~ ^^
夜景地的巴士在大堆巴士站嗰度, 因為只係第二個站, 以為佢好準時20:05到, 點知都遲咗五分鐘, 不過見到都有日本人係度等, 應該冇等錯掛~ 上到車後, 發現坐位已坐得八八九九, 如果大家想坐得舒服D, 應該要去中央車站搭會好一D~
沿途亦有少少講解地方的名勝與歷史, 同朝早的路線一樣亦係照樣上城山, 不過比較特別係會停留十五分鐘, 如果有一日卷就唔駛俾錢, 如果唔係就要俾200YEN 的夜景乘車卷~
15MIN 以為好唔夠時間, 不過可能就係大家覺得時間唔夠, 所以個個都急急腳咁, 去到影咗幾幅相, 欣賞咗一陣後就返去巴士, 因為怕冇位坐~ ^^ 香港人係比較醒目D~ 好彩今朝雖然天陰, 但由下午開始就幾好天, 晚上鹿兒島的夜景亦很清晰很美麗, 當然冇香港咁璀璨, 但都唔錯~ 之後返到中央車站大約九點, 見到SHOPPING MALL D 鋪都相繼關門, 返酒店訓教又好似冇咩嘢做, 咁見到AMZ PLAZA 就有間CINEMA, 不如睇套戲LA~
係車站附近的藥妝店買咗嘢後, 就返酒店放低今日的戰利品, 洗個臉同換咗對拖鞋, 就落去睇戲~ 今次我睇無限之住人, 其實我有睇過漫畫, 日文都識D, 不過都係明得一半左右, 不過當睇吓木村LA~~ (套戲唔係遊記的一部份, 唔COMMENT 住)
一日非常豐富的行程就以木村完結, 聽日繼續~~~